Muossavia en cass da mortori
Annunziar al secretariat dalla pleiv per telefon: 076 415 15 53.
Lavurs preparatorias per ina sepultura ella Pleiv Tujetsch
Transport ed organisaziun
Tenor basegns e giavisch dar part al survetsch da bara ch’ein segideivels en tuts graus e surprendan era l’organisaziun da transport, procurar pil vischi, ina crusch ed il vestgir il defunct.
Adressas:
Furgertaxi SA Monn: Via Raveras 33, 7180 Mustér, 081 936 44 44
Caprez Bestattungen AG: Städtlistrasse 2a, 7130 Glion, 081 252 45 59
ABAS Bestattungen: Städtlistrasse 16, 7130 Glion, 081 286 92 11
Termin da sepultura
Fixar il termin da sepultura cun la secretaria.
- Cun vischi enteifer 72 uras
- Cun urna ni autras fuormas ei il termin flexibels
Fossa, urna ni fossa communabla?
Fuorma dalla sepultura cun quater differentas pusseivladads:
- vischi en fossa
- urna en fossa
- fossa privata cun plachetta
- fossa communabla
Il satrar en ina fossa existenta ei pusseivel enteifer ils emprems 12 onns.
Fuorma da sepultura
- survetsch divin en baselgia s.Vigeli cun vischi ni urna
- mo in survetsch divin/devoziun da cumiau en baselgia parochiala ni
- mo el ravugl dalla famiglia cun in survetsch divin ni devoziun en baselgia
Annunzia all’administraziun communala
La secretaria annunzia la mort all’administraziun communala ed organisescha sch’ei drova il cavar fossa.
Consultar igl uorden da santeri dalla vischnaunca da Tujetsch. Ils cuosts per cavar fossa vegnan incassai entras l’administraziun communala.
Cant sacral da sepultura
- chor da sepultura ni
- cant ord il «clom» ni
- in’autra versiun (cun cant e musica privat)
Sch’il Chor da sepultura vegn giavischaus, annunzia la secretaria quei al responsabel dil chor. Il dirigent dil chor prepara in program da cant cun contactar la famiglia e risguardar giavischs specials da canzuns. Giavischs per cant e musica privats duront il survetsch divin vegnan risguardai el program.
Tuccar da miert
Ei vegn tuccau da miert pér suenter ch’il termin da sepultura ei fixaus, definiu sin giavisch in datum da rusari e planisau la messa dil trentavel. Sch’il defunct ni la defuncta ein derivonts da Rueras ni da Selva vegn ei tuccau gl’emprem leu.
Da tuccar els uclauns vegn ei schau liber.
Ei vegn da principi tuccau per mintga vischin/a che ha las scartiras en vischnaunca cun consultaziun e lubientscha dils tierparents.
Il tuccar succeda duront il di denter las 09:00 e las 16:00 (Duront miezdi, denter las 11:00 e las 13:00 vegn buca tuccau).
Rusari da morts
La recitaziun dil rusari da morts vegn organisada sin giavisch dils tierparents ella parochiala a Sedrun ni en baselgia s.Giachen a Rueras. Sin giavisch special sa era vegnir recitau il rusari en ina dallas capluttas dalla val. La secretaria annunzia alla persuna responsabla ch’empeila il rusari.
Organisaziun dil survetsch divin funeral
La famiglia contactescha il plevon ed organisescha cun el il survetsch divin. Scriver il riug da bara (cuors dalla veta) (voluntari) cun in lectur ni lectura.
Plinavon mira la famiglia en cass da vischi per quater purtaders ed en cass d’ina urna ina purtadra ni in purtader da quella.
Plinavon in purtader ni ina purtadra dalla crusch. Medemamein fixar purtaders/as da flurs e tut auter che accumpogna il trapassau, la trapassada al santeri.
Plazzament dil vischi ni urna en baselgia
La famiglia communichescha cu il vischi ni l’urna vegnan purtai en baselgia.
- Il vischi duei vegnir plazzaus ella caplutta da morts, cuort avon sepultura era davontier el chor.
- L’urna cun tschupials e fluras sa vegnir plazzada en baselgia davontier el chor (gia avon la sepultura) ni era en caplutta da morts.
- Sin giavisch sa la devoziun da sepultura era entscheiver sco tradiziun en corridor-baselgia cun il regress en baselgia cun urna ni vischi.
Messa dil tierz e caudonn
Fixar la messa dil tierz (trentavel) tenor tradiziun. La messa caudonn ha liug suenter in onn.
Disposiziuns specialas
- Reformai informeschan la canzlia communala e sedrezzan agl uffeci cumpetent a Mustér. La celebraziun da malencurada sa ver liug ella baselgia parochiala. Il termin vegn fixaus cul secretariat.
- Per survetschs divins en baselgia da persunas ch’ein extradas dalla baselgia vegn incassada ina indemnisaziun da frs. 700.–.
Versiun dil settember 2026
