Survetschs pastorals
Esser datier dils carstgauns – tedlar, accumpignar e dar speronza.
La Baselgia viva dalla cardientscha e dalla cuminonza. Ella vul esser datier als carstgauns, buca mo en baselgia, mobein era el mintgadi, en muments da legria e da tristezia, en temps da speronza, malsegirtad e damondas.
Il team pastoral dalla pleiv Tujetsch porscha accumpignament spiritual e pastoraziun a tut quels che giavischan in discuors, in cussegl ni semplamein enzATgi che teidla. Nus prendein temps per Vus e per quei che occupescha Vus. Mintga carstgaun ei beinvegnius cun sia historia persunala, sias damondas e sia cardientscha.
Visetas pastoralas
La pastoraziun vul esser datier als carstgauns, surtut era da quels che san buca pli prender part regularmein alla veta dalla pleiv. Visetas a casa, en casa da tgira ni el spital ein ina pusseivladad da mantener il contact, da regalar temps e da dar forza e speronza.
Sche Vus giavischeis ina viseta da nies plevon sur Mathews ni d’ina persuna dil team pastoral, saveis Vus bugen s’annunziar tier il secretariat dalla pleiv.
Communiun a casa
L’eucaristia ei il sacrament dalla cuminonza cun Cristus e denter nus carstgauns. Tgi che sa buca pli separticipar alla celebraziun eucaristica en baselgia, duei tuttina saver sentir quella cuminonza.
Perquei purtein nus bugen la sontga communiun a casa tier persunas malsaunas, attempadas ni limitadas en lur mobilitad. Quella viseta ei in segn concret che negin vegn emblidaus e che mintgin resta ina part dalla cuminonza cristiana.
La communiun vegn purtada mintgamai igl emprem venderdis dil meins ni tenor cunvegnientscha.
Annunzia: Secretariat dalla pleiv, 076 415 15 53, dunna Marina Giger-Lombris.
Viver cuminonza
La Baselgia ei dapli ch’in edifeci. Ella ei ina cuminonza viva da carstgauns che partan lur cardientscha, lur speronzas e lur veta.
Cun sentupadas, occurenzas e tradiziuns localas vulein nus promover la convivenza e crear spazis nua che carstgauns da differentas generaziuns san s’entupar e sentir ch’els appartegnan ad ina cuminonza viva.
Gest en in temps nua che la solitariadad crescha e las structuras da nos vitgs semidan, vulein nus cultivar las relaziuns e viver la solidaritad cristiana.
